താടിയുള്ള വരനും ദീനില്ലാത്ത മടവൂരിയും.!

“മുട്ടിനു താഴെ പെട്ടെന്നവസാനിക്കുന്ന മിനി സ്കർട്ടും,

ദന്തങ്ങളിൽ സദാ വിഹരിക്കുന്ന അറാക്കിന്റെ കൊള്ളിയും,

ഒരിക്കലും ബാർബറുടെ കരങ്ങൾ തലോടിയിട്ടില്ലാത്ത താടിരോമങ്ങളും

ഇവരെ വ്യത്യസ്തരാക്കുന്നു...”

മുജാഹിദ് പ്രവർത്തകരെ പരിഹസിച്ചു കൊണ്ട് പണ്ട് മൌദൂദികൾ എഴുതിയ വരികളാണു മുകളിൽ വായിച്ചത്.. ഇത് എഴുതുമ്പോൾ മൌദൂദി സാഹിത്യകാരൻ ഒരിക്കലും താൻ മുത്ത് റസൂലിന്റെ മൂന്ന് ചര്യകളെയാണ് ഈ നാലു വരികളിലൂടെ പരിഹസിച്ചത് എന്ന് ഓർത്തിട്ടുണ്ടാവില്ല.. “നെരിയാണിക്കു താഴെ വസ്ത്രമുടുക്കുന്നവൻ നരകത്തിലാണ്“ , “നിങ്ങൾക്ക് ബുദ്ധിമുട്ടാവില്ലായിരുന്നു എങ്കിൽ അഞ്ചു നേരം പല്ലുതേക്കുന്നത് ഞാൻ നിങ്ങൾക്ക് നിർബന്ധമാക്കുമായിരുന്നു“ , “താടി നീട്ടുകയും മീശവെട്ടുകയും ചെയ്യുക“ .. ഇതു മൂന്നും കെ.എൻ.എം സെക്രട്ടറിയുടെ വാക്കുകളല്ല, മറിച്ച് മുഹമ്മദ് നബി(സ) യുടെ വാചകങ്ങളാണ്.. 

ഇത് മൌദൂദി ഹദീഥ് നിഷേധമാണ് എങ്കിൽ വേറെ ചില 'മൂർച്ചയുള്ള' വാചകങ്ങൾ കാണുക :

“ ചുരുക്കത്തിൽ ജൂത മുനാഫിഖായ അബൂഹുറൈറയുടെ ലക്ഷ്യം മുസ്’ലിംകൾ മുഴുവൻ താടി നീട്ടി മൊട്ടയടിച്ച് കണങ്കാൽ മദ്ധ്യം വരെയുള്ള മുറി മുണ്ടുടുത്ത് ആദിവാസികളെ പോലെ നടക്കണമെന്നതാണ്..” 

-ചേകന്നൂർ മൌലവി (ഖുർ’ആനിൽ ഹജ്ജിനുള്ള സ്ഥാനവും രൂപവും . പേജ് 115)

താടിയെ കുറിച്ച് മഹാനായ അബൂഹുറൈറ ഹദീഥ് ഉദ്ധരിച്ചതിനെ കുറിച്ച് ഇയാൾ പറഞ്ഞത് നോക്കൂ.. ഇവിടെ ഇയാൾ പരിഹസിച്ചതും താടിയെ കുറിച്ചുള്ള ഹദീഥുകളും നെരിയാണിക്കു മീതെ വസ്ത്രമുടുക്കുന്നതിനെയും കുറിച്ചു തന്നെ..

മൌദൂദി- ചേകന്നൂർ ഹദീഥ് നിഷേധം നാം വായിച്ചു. ഇനി നമുക്ക് കാണാനുള്ളത് ലേറ്റസ്റ്റ് പരിഹാസമാണ്, അത് കാണുക:

“താടി വളർത്തി വികൃത രൂപം ഉണ്ടാക്കുന്നവരാണ് ശിക്ഷിക്കപ്പെടുമോ എന്ന് ഭയപ്പെടേണ്ടത്. ഇസ്’ലാം ഭംഗിയേയാണ് ഇഷ്ടപ്പെടുന്നത്..”

-അബ്ദുസ്സലാം സുല്ലമി (അൽഫനാർ 2011 മെയ്-ജൂലൈ , പേജ് 65)

സുബ്’ഹാനല്ലാഹ്.. താടി വളർത്തിയാൾ വികൃത രൂപമാവുമത്രേ..! നബി(സ) പഠിപ്പിച്ച ഒരു കാര്യം ചെയ്താൽ വികൃത രൂപമുണ്ടാവുമെന്ന് പറയുന്നവന് ഇസ്’ലാമിലുള്ള സ്ഥാനമെന്താണെന്ന് നിങ്ങൾ തീരുമാനിച്ചാൽ മതി..ചേകന്നൂരികൾക്കും മൌദൂദികൾക്കും ശേഷം താടി പരിഹസിക്കുന്ന മൂന്നാമനായി സുല്ലമി മാറിയിരിക്കുകയാണ്.. ഏ സുല്ലമീ, താങ്കൾക്കെന്തു പറ്റി??? ഹദീഥ് നിഷേധം തലക്കു കയറി എന്തും വിളിച്ചു പറയാം എന്ന സ്ഥിതിയിലേക്ക് താങ്കളും താങ്കളുടെ സഹപ്രവർത്തകരും അധ്:പതിച്ചു പോയോ??

ഈയടുത്ത കാലത്താണ് താടിക്കെതിരെ ഇവരുടെ ഉറഞ്ഞുതുള്ളലിനു തുടക്കം കുറിച്ചത് ‘എ.എസ്സും’ (അബ്ദുസ്സലാം സുല്ലമി) ‘എമ്മാറും’ (മുജീബ് റഹ്’മാൻ) പിന്നെ കുറേ വലാട്ടികളും ഇപ്പോൾ ഇതു പ്രചരിപ്പിച്ചു കൊണ്ടിരിക്കുകയാണ്..

“താടിയുള്ള വരനെ വേണമെന്ന്” പറഞ്ഞു കൊണ്ടുള്ള ഒര്യു വിവാഹ പരസ്യം കണ്ടതോടെയാണ് എം.ആറിനു ഇളക്കം പിടിച്ചത്.. മാത്രവുമല്ല, സലഫികളുടെ ഈറ്റില്ലമായ ഒരു സ്ഥലത്ത് എം.ആർ ജനാസയിൽ പങ്കെടുത്തപ്പോൾ യുവാക്കളിൽ അധികപേരും തൊപ്പിയും താടിയും ധരിച്ചിരിക്കുന്നവത്രേ..!! ഇത്രേം വല്ല്യ തിന്മ കണ്ടതോടെ എമ്മാറിനു അടങ്ങി നിൽക്കാനായില്ല.. അങ്ങനെയായിരിക്കാം “താടിക്കാർക്കെതിരെ” അദ്ദേഹവും ഉറഞ്ഞുതുള്ളിയത്.

താടി സലഫികളുടെ ഒരു ‘ഐഡന്റിറ്റി’ ആവുന്നതിനോടാണ് ഇദ്ദേഹത്തിനു വലിയ എതിർപ്പ്.. എന്നാൽ لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ (“മുഹമ്മദ് നബി(സ) യിൽ നിങ്ങൾക്ക് ഉത്തമമായ മാതൃകയുണ്ട്”) എന്ന സൂറത്തു അഹ്സാബിലെ 21-ആം വചനം ഇദ്ദേഹം മറന്നു പോയോ?? മുഹമ്മദ് നബി(സ)ക്ക് നീണ്ട താടിയുണ്ടായിരുന്നതായി ജാബിറുബ്നു സമൂറ (റ) ഉദ്ധരിച്ച ഹദീഥിൽ വ്യക്തമായി കാണാം.. മുസ്’ലിംകൾക്ക് ഉത്തമ മാതൃകയുള്ള മുത്ത് നബി(സ്വ)ക്ക് താടിയുണ്ട് എങ്കിൽ, അത് ഹദീഥുകളിൽ വന്നിട്ടുണ്ട് എങ്കിൽ, അതൊരു ഐഡന്റിറ്റി ആയി സ്വീകരിക്കുന്നതിൽ ഇത്ര വേവലാതിപ്പെടാനെന്തിരിക്കുന്നു?

പിന്നെയുള്ളത് വിവാഹ പരസ്യമാണ്.പടച്ചവനെ പേടിച്ചു ജീവിക്കുന്ന ഒരു മനുഷ്യൻ, തന്റെ മകൾക്ക് താടി വളർത്തി, ദീനിയ്യായി ജീവിക്കുന്ന, നെരിയാണിക്ക് മീതെ വസ്ത്രമുടുത്ത് ജീവിക്കുന്ന ഒരു നല്ല വരനെ വേണം എന്ന് ആശിക്കുന്നത് കാണുമ്പോൾ, അതിനെ പ്രോത്സാഹിപ്പിക്കുന്നതിനു പകരം, അതിനെ കളിയാക്കുകയും വിമർശിക്കുകയും ചെയ്യുന്നത് ശരിയാണോ?? പ്രവാചകന്റെ മുഖത്ത് താടിയുണ്ടായിരുന്നുവെങ്കിൽ, തന്റെ മകളുടെ ഭർത്താവിന്റെ മുഖത്തും അതുണ്ടായിരിക്കണം എന്ന് കരുതുന്നതണോ ഇത്ര വല്ല്യ തെറ്റ്?

ദാഹിച്ച പട്ടിക്കു വെള്ളം കൊടുത്തയാൾ സ്വർഗ്ഗത്തിൽ പോയി എന്നും, എന്നാൽ താടി വെച്ചത് കൊണ്ട് ആരും സ്വർഗ്ഗത്തിൽ പോയിട്ടില്ലെന്നതുമാണ്, താടിയെ എതിർക്കാൻ സുല്ലമി അവർകൾക്കു കിട്ടിയ കച്ചിത്തുരുമ്പ്.! ഒരു കാര്യം ഇസ്’ലാമിക നിയമമാവണമെങ്കിൽ, ആ കാര്യം ചെയ്താൽ സ്വർഗ്ഗ പ്രവേശം ലഭിക്കും എന്ന് ഹദീസ് വേണമത്രേ.! ഒറ്റ കാര്യം ചോദിക്കട്ടെ, വസ്ത്രം ധരിച്ചാൽ സ്വർഗ്ഗത്തിൽ പോകുമെന്ന് ഹദീഥിൽ പറഞ്ഞിട്ടുണ്ടോ?? ഇല്ലെന്നു വെച്ച് സുല്ലമിയും SSF (സലാം സുല്ലമി ഫാൻസ്) കാരും നാളെ മുതൽ ഉടുതുണി അഴിച്ച് നടക്കുമോ?? അതുപോലെ തന്നെ പല്ലു തേച്ച് വായ വൃത്തിയാക്കിയവൻ സ്വർഗ്ഗത്തിലാണ് എന്ന് ഏതെങ്കിലും ഹദീഥിലുണ്ടോ?? അതിനർത്ഥം പല്ലു തേക്കൽ നിർബന്ധമില്ല എന്നാണോ ബഹുമാനപ്പെട്ട സുല്ലമീ?? പിന്നെയും സുല്ലമി എഴുതുന്നു:

“താടി വെച്ച് പിടിപ്പിച്ചാലോ, അതിന്മേൽ തടവിയാലോ പ്രതിഫലമുണ്ടെന്ന് നബി(സ്വ) ഉണർത്തിയിട്ടില്ല”

ഒരു കാര്യത്തിന്റെ പ്രതിഫലം പറഞ്ഞാലേ ആ പ്രവൃത്തി നിർബന്ധമാകൂ എന്ന് ഏത് വാറോലയിൽ നിന്നാണിയാൾക്ക് കിട്ടിയത് എന്ന് മനസ്സിലാകുന്നില്ല.. വലതു കൈ കൊണ്ട് ഭക്ഷണം കഴിച്ചതു കൊണ്ട് അതിനു പ്രതിഫലമുണ്ടെന്ന് ഏതെങ്കിലുമൊരു ഹദീഥിലുണ്ടോ? എന്നുവെച്ച് ഇടതു കൈ കൊണ്ട് തിന്നാമെന്നാണോ? എന്തു പറ്റി സുല്ലമീ താങ്കൾക്ക്?

ഇനി താടിയെ കുറിച്ച് ഹദീഥുകളിൽ പറഞ്ഞതെന്താണെന്ന് നമുക്ക് പരിശോധിക്കാം.

1.  ഇബ്നുഉമര്‍(റ) പറയുന്നു: നബി(സ)അരുളി: നിങ്ങള്‍ മുശ്രിക്കുകള്‍ക്ക് എതിരാകുവീന്‍. താടി നീട്ടുകയും മീശവെട്ടുകയും ചെയ്യുക. (ബുഖാരി. 7. 72. 780)
2. റസൂൽ (സ്വ) പറഞ്ഞതായി ഇബ്നു ഉമർ (റ) പറഞ്ഞു : മീശ വെട്ടിച്ചുരുക്കുകയും താടിയെ വെറുതെ വിടുകയും ചെയ്യുക (ബുഖാരി & മുസ്’ലിം)
3. അബൂഹുറൈറ(റ) നിവേദനം: റസൂൽ (സ്വ) പറഞ്ഞു : മീശ വെട്ടിച്ചുരുക്കുകയും താടിയെ വെറുതെ വിടുകയും ചെയ്യുക. വേദക്കാരിൽ നിന്നും നിങ്ങൾ വിഭിന്നരാവുക (മുസ്’ലിം)

നോക്കൂ.. ഇത് ചിലത് മാത്രം..ഇത്രയും ഹദീഥുകളെ തള്ളിക്കളഞ്ഞുകൊണ്ടല്ലാതെ ഇവർക്ക് താടി യെ പരിഹസിക്കാനാവുമോ?? പ്രവാചകന്റെ വായിൽ നിന്നും ഉതിർന്നു വീണ വാക്കുകളല്ലേ ഇവ? ഇതിനെ തള്ളിക്കളയാൻ അഹങ്കാരികൾക്കല്ലാതെ സാധിക്കുമോ?? പക്ഷപാതിത്തങ്ങൾ മറന്ന് സ്വയം നാമൊന്നാലോചിച്ചു നോക്കുക..

ഇനി താടി വടിക്കുന്നതിനെ മദ്’ഹബുകൾ എങ്ങനെ കാണുന്നു എന്ന് നോക്കാം:

ഹനഫികൾ:

ഇബ്നുൽ ആബിദീൻ പറഞ്ഞു : ഒരു പുരുഷനു താടി വെട്ടുന്നത് നിഷിദ്ധമാക്കപ്പെട്ടിരിക്കുന്നു (ധറദ്ധുൽ മുഖ്താർ 2:4:18)

മാലിക്കികൾ:

അൽ അദ്’വി പറഞ്ഞു : താടിയെല്ലുകൾക്ക് താഴെയുള്ളത് എന്തും വടിച്ചു കളയുന്നത് ഇമാം മാലിക്(റ) വെറുത്തിരുന്നതായി റിപോർട്ട് ചെയ്തിട്ടുണ്ട്. അദ്ദേഹം പറഞ്ഞത് അത് മജൂസികളുടെ പ്രവൃത്തിയാണ് “ (ശറഹുരിസാലക്ക് അൽ അദ്’വി നൽകിയ വ്യാഖ്യാനം :2:411)

ശാഫീഈകൾ:

അഥ്’റൂഇ പറഞ്ഞു :പ്രശ്നങ്ങളൊന്നുമില്ലെങ്കിലല്ലാതെ താടി വടിക്കുന്നത് നിഷിദ്ധമായതാണ് എന്ന നിലപാടാണ് ഏറ്റവും ശരിയായത് (ശർഹുൽ ഉബബ്)

ഹമ്പലികൾ:

താടി വടിക്കൽ നിധിദ്ധമാണെന്ന വിഷയത്തിൽ നമ്മുടെ മദ്’ഹബുകാർ ഏകോപിച്ചിട്ട്യുണ്ട് (ഗിഥാഉൽ അൽബാബ് 1:376)

നോക്കൂ, നാലു മദ്’ഹബുകൾക്കിടയിൽ പോലും അഭിപ്രായ വ്യത്യാസമില്ല.. എന്നാൽ ഹദീഥുകൾ നിഷേധിച്ച് സുല്ലമിയും കൂട്ടരും ഇപ്പോഴെത്തിയിരിക്കുന്ന അവസ്ഥ നോക്കൂ.. അവസാനം സുല്ലമി തന്നെ എഴുതുന്നത് കാണൂ:

“താടി വളർത്തുവാൻ പറയുന്ന ഹദീഥുകളെ അതിലുപരി വ്യാഖ്യാനിക്കാൻ കഴിയുന്നതാണ്”

അഥവാ, താടിക്കെതിരെ എന്തു ദുർവ്യാഖ്യാനം നടത്താനും സുല്ലമി ഒരുക്കമാണെന്നു ചുരുക്കം.. ഒരു കാര്യം നേരെ പറഞ്ഞാൽ മനസ്സിലാക്കാൻ കഴിയാത്തപ്പോഴാണല്ലോ വ്യാഖ്യാനം വേണ്ടി വരിക.. കുതന്ത്രക്കാരായ മടവൂരികൾക്കും മുഫ്തിയായ സുല്ലമിക്കും പലപ്പോഴും വ്യാഖ്യാനവും വിട്ട് ദുർവ്വ്യാഖ്യാനിക്കേണ്ടിയും വന്നേക്കാം..

ഹദീഥുകളോട്, മുത്ത് നബിയോട്, അല്പമെങ്കിലും ബഹുമാനവും ആദരവുമുള്ള മടവൂരികളും അഖലാനികളും ചിന്തിക്കട്ടെ.. സൌന്ദര്യത്തിന്റെ പേരും പറഞ്ഞാണ് നിങ്ങൾ താടിയെ പരിഹസിക്കുന്നത് എങ്കിൽ, ഒന്നറിയുക ലോകത്തെ ഏറ്റവും സുന്ദരനായ മുത്ത് റസൂലിന്റെ മുഖത്ത് താടിയുണ്ടായിരുന്നു..! ആ പ്രവാചകനെക്കാൾ ഒരു സുന്ദരനെ ഞങ്ങൾ ദർശിച്ചിട്ടില്ല എന്ന് സ്വഹാബികൾ പറഞ്ഞതായി കാണാം.. താടി വളർത്തലാണ് നബി(സ്വ)യുടെ അനുയായികളുടെ സൌന്ദര്യം.. റസൂലിനെ അനുസരിക്കുന്നതിലാണ് സൌന്ദര്യം.. ധിക്കരിക്കുന്നതിലല്ല..

അവസാന പയറ്റ്: ഇത്രയും വായിച്ചിട്ടും താടി വെച്ചില്ലെങ്കിലും, അതിനെ പരിഹസിക്കുന്നതെങ്കിലും നിർത്തുക.. റസൂലിനെ അനുസരിക്കുന്നവർ അനുസരിച്ചോട്ടെ..

അഭിപ്രായം കമന്റ് ബോക്സിലൂടെ അറിയിക്കാൻ മറക്കരുതേ...