മുസ്ലിംകൾക്കിടയിലെ നാറാണത്തു ഭ്രാന്തന്മാർ..!

സർവ്വ ശക്തനായ ലോക സ്രഷ്ടാവിന്റെ നാമത്തിൽ..


നാറാണത്തു ഭ്രാന്തനെ അറിയാത്തവരുണ്ടാകില്ല.. കഷ്ടപ്പെട്ട് പാടു പെട്ട് ഭാരമുള്ള ഒരു കല്ല് മലമുകളിലേക്ക് കയറ്റുകയും, തന്റെ അതികഠിനമായ പരിശ്രമങ്ങൾക്കു ശേഷം കല്ല് മുകളിലെത്തിയാൽ ആ കല്ല് താഴേക്ക് ഉരുട്ടി വിട്ട് അത് താഴേക്ക് പോകുന്നത് നോക്കി കൈകൊട്ടിച്ചിരിക്കുന്ന ഒരു മുഴുഭ്രാന്തൻ..!


എന്നാൽ നമുക്കിടയിലും ഇത്തരം ചില ഭ്രാന്തന്മാരുണ്ട്.. അവർ മുകളിലേക്ക് കയറ്റിയത് കല്ലല്ല.. മറിച്ച് പ്രവർത്തനങ്ങളാണ്..! പല പള്ളികൾക്കു മുൻപിലും “നവാഗതർക്ക് സ്വാഗതം” എന്ന ബോർഡ് വെക്കേണ്ട സ്ഥിതിയായിരുന്നു.. ഈ RSP കാരുടെ (തെറ്റിദ്ധരിക്കരുത്, RSP എന്നാൽ : റമദാൻ സ്പെഷൽ പ്രവർത്തകർ)  തിരക്ക് മൂലം സ്ഥിരം ഒന്നാം സ്വഫ്ഫിലുണ്ടായിരുന്ന പലരും അവസാന സ്വഫ്ഫിലെത്തിയിരുന്നു.. അൽഹംദുലില്ലാഹ്, വളരെ നല്ല കാര്യം തന്നെ.. എന്നാൽ റമദാൻ കഴിഞ്ഞതോടെ പലരും പള്ളിയുടെ അടുത്തുകൂടി പോലും പോകാതെയായി.. 



റമദാനിൽ കഷ്ടപ്പെട്ട് അതിരാവിലെ എഴുനേറ്റ് അത്താഴം കഴിക്കുന്നു, അതിനു ശേഷം സുബഹി വരെ ദിക്’റുകളും ഖുർ;ആ‍ൻ പാരായണവുമായി കഴിഞ്ഞു കൂടുന്നു.. ശേഷം സുബഹി നമസ്കരിക്കാൻ പള്ളിയിലേക്ക്.. നമസ്കാര ശേഷം ഖുർ’ആൻ ക്ലാസുകൾ.. ഉദയം വരെ പള്ളിയിലിരുന്ന് ശേഷം സുന്നത്തായ രണ്ടു റക്’അത്ത് നമസ്കരിക്കുന്നു.. പലരും ളുഹാ നമസ്കാരം പതിവായി നമസ്കരിക്കുന്നു.. ശേഷം ബാങ്ക് കൊടുക്കുമ്പോഴേക്ക് ളുഹറിനു പള്ളിയിൽ.! അല്പം കഴിയുമ്പോഴേക്ക് അസരിനു പള്ളിയിൽ.. അത് കഴിഞ്ഞു പലപ്പോഴും മഗ്രിബ് വരെ പള്ളിയിൽ തന്നെ.. രാവിലെ മുതൽ പട്ടിണി കിടന്നിട്ടും ഒരു ക്ഷീണവുമില്ലാതെ ഖുർ;ആൻ ഓതുന്നു.. ശേഷം മഗ്രിബ് ബാങ്ക് കൊടുക്കുമ്പോൾ എന്തെങ്കിലും ലഘുഭക്ഷണം മാത്രം കഴിച്ച്  വീണ്ടും നമസ്കാരം.. പിന്നെ എന്തെങ്കിലും കഴിച്ച് ഒന്ന് വിശ്രമിക്കുമ്പോഴേക്ക് ഇശാ ബാങ്ക്.! എല്ലാ ക്ഷീണവും മറന്ന് പള്ളിയിലേക്ക് ഓടുന്നു.. നേരെ നിൽകാൻ പോലും കഴിയില്ലെങ്കിലും പിന്നെ പതിനൊന്ന് റക്’അത്ത് തറാവീഹും.! മണിക്കൂറുകളോളം നിന്ന് നമസ്കാരം.! അതിനു ശേഷം ഖുർ’ആൻ പാരായണവും ദൈവ സ്മരണയും..! ഒന്നുറങ്ങുമ്പോഴേക്ക് വീണ്ടും സുബഹി ബാങ്ക്..!


പടച്ചോൻ നമുക്ക് തന്ന അനുഗ്രഹം വെച്ച് നോക്കുമ്പോൾ ഇതൊന്നും ഒന്നുമല്ലെങ്കിലും, ഇത്രയെങ്കിലും ഈ ഖൌം ചെയ്തല്ലോ.. ഇത്രയും കഷ്ടപ്പെട്ട് പ്രവർത്തനങ്ങൾ ചെയ്തു (അഥവാ കല്ല് മുകളിലേക്ക് കയറ്റി) പെരുന്നാളിന്റെ മാസപ്പിറവി കണ്ടപ്പോഴേക്ക് അതെല്ലാം താഴേക്ക് ഉരുട്ടി വിട്ട് കൈകൊട്ടിച്ചിരിക്കുകയാണു പലരും.. ഒരു മാസം അല്ലാഹു ഞങ്ങളെ കഷ്ടപ്പെടുത്തി, ഇനി പതിനൊന്ന് മാസം കാണിച്ചു തരാം എന്നാണ് പലരുടേയും പ്രവർത്തനങ്ങൾ കണ്ടാൽ തോന്നുക.. ഈ ആർ.എസ്.പിക്കാരുടെ ഇപ്പോഴത്തെ പ്രവർത്തനങ്ങൾ കണ്ടാൽ അല്ലാഹു സ്വർഗ്ഗം കൊടുത്തതായി ഇവരോട് വിളിച്ചു പറഞ്ഞിട്ടുണ്ട് എന്നാണു തോന്നുക.. 


രണ്ടു ദിവസം മുൻപ് രണ്ട് ചെറുപ്പക്കാർ “ഈ റമദാൻ കഴിഞ്ഞു കിട്ടിയല്ലോ” എന്ന് പറയുന്നത് കേട്ടു.. യഥാർത്ഥത്തിൽ ഇവിടെയാണ് നാം ചിന്തിക്കേണ്ടത്.. ഇത് ആരെ പറ്റിക്കാനാണ് സഹോദരന്മാരേ?? ഇവിടെയാണു സലഫി പണ്ഡിതന്മാരുടെ ഒരു വാക്ക് നാം ഓർക്കേണ്ടത്.. “നീ റമദാനിയ്യൻ ആകരുത്, നീ റബ്ബാനിയ്യൻ ആകുക” റമദാനിനു വേണ്ടിയല്ല , നാം കർമ്മങ്ങൾ അനുഷ്ടിക്കേണ്ടത് റബ്ബിനു വേണ്ടിയാണ്..


മാത്രമല്ല, “അല്ലാഹുവിനു തുടർച്ചയുള്ള പ്രവർത്തനങ്ങളാണിഷ്ടം, അത് എത്ര കുറവായിരുന്നാലും” എന്ന നബിവചനവും നാം ഓർക്കേണ്ടതുണ്ട്.. റമദാനിൽ നാം ഏതൊക്കെ സൽക്കർമ്മങ്ങൾ ചെയ്തിട്ടുണ്ടെങ്കിലും, ഏതൊക്കെ തിന്മകളിൽ നിന്ന് വിട്ടു നിന്നിട്ടുണ്ടെങ്കിലും, അവ റമദാനിനു ശേഷവും അത് പൊലെ തന്നെ കൊണ്ടു പോകാൻ നമുക്കാവണം.. റമദാനിൽ നാം മ്യൂസിക് എന്ന ഹറാം ഒഴിവാക്കി എങ്കിൽ, റമദാനിൽ നാം നെരിയാണിക്കു മുകളിൽ വസ്ത്രം ഉടുത്തു എങ്കിൽ, റമദാനിൽ നാം ഏഷണിയും പരദൂഷണവും ഒഴിവാക്കി എങ്കിൽ, റമദാനിനു ശേഷവും അവ ഒഴിവാക്കി തന്നെ ജീവിക്കാൻ നമുക്ക് സാധിക്കണം.. ഇതിനു പകരമായി പെരുന്നാൾ വസ്ത്രം തന്നെ നെരിയാണിക്കു താഴെയാണ് എങ്കിൽ, നാമൊന്ന് മനസ്സിലാക്കുക, നമുക്കല്ലാഹുവിനെ പറ്റിക്കാൻ കഴിയില്ല.. തീർച്ച..


അവസാന പയറ്റ് : പെരുന്നാളിനു സന്തോഷം പ്രകടിപ്പിക്കാനും ആഘോഷിക്കാനും മദ്യ വിതരണം വരെ തുടങ്ങിയിട്ടുണ്ടത്രേ പല RSP യുവാക്കൾക്കിടയിലും..!!!!!!!

അഭിപ്രായങ്ങൾ കമന്റ് ബോക്സിലൂടെ അറിയിക്കാൻ മറക്കരുതേ..